2017 йилнинг февраль ойида фонд биржасида 18 та савдо сессияси ўтказилиб, 30 та акциядорлик жамиятининг 14,8 млн. дона қимматли қоғозлари билан 124 та савдо битими тузилди. Cавдо айланмаси бу ойда 4,5 млрд. сўмга етди.

Февраль ойида фонд биржасининг асосий секциясида (“Main Board”) – 4,4 млрд. сўмлик 108 та битим ҳамда жисмоний шахслар учун клирингсиз битимлар тузиш имкониятини берувчи секцияда (“NC Board”) – 0,01 млрд. сўмлик 16 та битим амалга оширилди.

Таҳлиллар, февраль ойи айланмасининг 93,7 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 24 февраль санасида Ягона дастурий-техник комплекснинг асосий секциясида (“Main Board”) "Asia Alliance Bank" АТБнинг 4,2 млн. дона акцияси билан 1,08 млрд. сўм миқдорида тузилди. 2017 йилнинг дастлабки икки ойида эса ушбу банкнинг 12,5 млн. дона акциялари билан жами 3,3 млрд. сўмлик савдо битимлари тузилган бўлиб, ушбу кўрсаткич "Asia Alliance Bank" АТБни савдо айланмаси ҳажми юқори бўлган ТОП-10 эмитентлар орасида етакчиликни қўлга киритишига хизмат қилди.

Ҳудудий жиҳатдан қаралганда, якунига етган февраль ойида фонд биржасида республикамизнинг 8 та ҳудудида жойлашган листинг компаниялари қимматли қоғозлари билан савдо битимлари имзоланди. Уларнинг энг юқори ҳажми Тошкент шаҳри (95,5 фоиз) ва Фарғона вилоятидаги (3,6 фоиз) акциядорлик жамиятлари ҳисобига тўғри келди.

Шунингдек, ўтган ойда инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 84,8 фоизи, амалга оширилган битимлар сонининг эса 66,9 фоизи айнан улар ҳиссасига тўғри келди.

Муҳим кўрсаткичлардан бири ҳисобланган қимматли қоғозларнинг ликвидлилик коэффициенти февраль ойида умумий ҳолда 1,05 пунктни ташкил этди. Ҳисобот даврида қимматли қоғозлар билан тузилган биржа битимларининг деярли ярми номинал қийматидан юқори нархда амалга оширилган. Энг юқори ликвидлилик коэффициенти суғурта компанияларининг қимматли қоғозларига тўғри келди (1,23 пункт).