2018 йилнинг 16 – 20 апрель кунлари «Тошкент» Республика фонд биржаси савдоларида 15 та акциядорлик жамиятининг қимматли қоғозлари билан 85 та битим қайд қилиниб, 18,6 млн. дона акция 3,2 млрд. сўмга сотилди.

Таҳлиллар жами савдо айланмасининг 67,4 фоизи тижорат банклари ва 29,4 фоизи агросаноат мажмуасига кирувчи жамиятларнинг қимматли қоғозлари билан амалга оширилган битимлардан иборат бўлганини кўрсатди.

Битимлар сони бўйича етакчиликни ўтган ҳафтада “Alskom” SK AJ эгаллаган ҳолда,  унинг 27 минг дона акцияси билан 46,3 млн. сўмлик 26 та битим амалга оширилди. Бу ҳафталик савдо айланмасининг 14,4 фоизини ташкил этади.

Қимматли қоғозлар билан ўртача кунлик савдо айланмаси ҳисобот даврида 640,3 млн. сўмни, ўртача битим қиймати эса 37,6 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 171,9 сўмдан иборат бўлди. 

Қимматли қоғозларнинг номинал нархига нисбатан юқори даражадаги фарқ “O'zkimyopolimersavdo” АЖ акциялари билан тузилган савдо битимларида кузатилди. Бунда номинал қиймати 2 380 сўм бўлган жамият акцияларининг савдо кунидаги биржа нархи 46 000 сўмни ташкил этди.

Ҳафта давомида савдо айланмаси ҳажми юқори бўлган эмитентларни XATB “Universal bank” (ҳафталик савдо айланмасининг – 57,3 фоизи ёки 1,8 млрд. сўм), “JONDOR PAXTA TOZALASH” AЖ (29,4 фоиз ёки 0,9 млрд. сўм), “O'zsanoatqurilishbank” АТБ (10,1 фоиз ёки 0,3 млрд. сўм) ва “Alskom” АЖ СК (1,4 фоиз ёки 45,3 млрд. сўм) ташкил этди. Савдо айланмасининг 98,2 фоизи (3,1 млрд. сўм) улар ҳиссасини  ташкил этди.

Ўтган ҳафтада инвесторлар тоифасига кўра биржа савдоларида суғурта компаниялари фаоллиги кузатилиб, тузилган умумий битимлар ҳажмининг – 40,6 фоизи (1,3 млрд. сўм), битимлар сонининг эса – 35,3 фоизи (30 дона) айнан улар ҳиссасига тўғри келди.

Шунингдек, ўтган ҳафтада фонд биржасида республикамизнинг 6 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Фарғона (57,3 фоиз) ва Бухоро вилоятидаги (29,4 фоиз) акциядорлик жамиятлари ҳисобига тўғри келди.

Фонд биржасида йил бошидан буён 79,8 млрд. сўмлик 4 697 та савдо битими қайд қилинди. Ушбу даврда биржа савдоларида 63 та акциядорлик жамиятининг 3,3 млрд. дона қимматли қоғозлари сотилган.