2018 йилнинг 23 - 27  апрель кунлари «Тошкент» Республика фонд биржаси савдоларида 17 та акциядорлик жамиятининг қимматли қоғозлари билан 56 та битим қайд қилиниб, 14,0  млн. дона акция 13,1 млрд. сўмга сотилди. Ушбу кўрсаткич ўтган ҳафта савдо якунларига нисбатан 4,1 маротабага кўпдир.

Таҳлиллар жами савдо айланмасининг 13,9 фоизи тижорат банклари қимматли қоғозлари билан амалга оширилган битимлардан иборат бўлганини кўрсатди.

Энг йирик битим 27 апрел санасида музокаралар аукциони тарзидаги секцияда (“Nego Board”) «O'ZKIMYOPOLIMERSAVDO» АЖнинг 138,1 минг дона акцияси билан 5,8 млрд. сўм миқдорида тузилди. Бир дона акциянинг сотув нархи 42 207 сўмни ташкил қилди.

Битимлар сони бўйича етакчиликни ўтган ҳафтада “O'zsanoatqurilishbank” ATБ эгаллаган ҳолда,  унинг 12 минг дона акцияси билан 230,4 млн. сўмлик 15 та битим амалга оширилди.

Қимматли қоғозлар билан ўртача кунлик савдо айланмаси ҳисобот даврида 2,6 млрд. сўмни, ўртача битим қиймати эса 234,3 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 937,0 сўмдан иборат бўлди. 

Қимматли қоғозларнинг номинал нархига нисбатан юқори даражадаги фарқ “KINAP” AЖ акциялари билан тузилган савдо битимларида кузатилди. Бунда номинал қиймати 5 000 сўм бўлган жамият акцияларининг савдо кунидаги биржа нархи 50 000 сўмни ташкил этди.

Ҳафта давомида савдо айланмаси ҳажми юқори бўлган эмитентларни “O'ZKIMYOPOLIMERSAVDO” AЖ (ҳафталик савдо айланмасининг – 85,8 фоизи ёки 11,2 млрд. сўм), “Turkiston” XATБ (12,1 фоиз ёки 1,6 млрд. сўм), “O'zsanoatqurilishbank” АТБ (1,7 фоиз ёки 0,2 млрд. сўм) ва “O'zbekgeofizika” АЖ (0,1 фоиз ёки 14 млн. сўм) ташкил этди. Савдо айланмасининг 99,7 фоизи (13,0 млрд. сўм) улар ҳиссасини  ташкил этди.

Ўтган ҳафтада инвесторлар тоифасига кўра биржа савдоларида           юридик шахслар фаоллиги кузатилиб, тузилган умумий битимлар            ҳажмининг – 86,8 фоизи (11,4 млрд. сўм), битимлар сонининг эса – 41,0 фоизи (22 дона) айнан улар ҳиссасига тўғри келди.

Шунингдек, ўтган ҳафтада фонд биржасида республикамизнинг 5 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳридаги (99,8 фоиз) акциядорлик жамиятлари ҳисобига тўғри келди.

Фонд биржасида йил бошидан буён 92,9 млрд. сўмлик 4 753 та савдо битими қайд қилинди. Ушбу даврда биржа савдоларида 69 та акциядорлик жамиятининг 3,3 млрд. дона қимматли қоғозлари сотилган.

Йил бошидан буён биржа савдо айланмасида тижорат банкларининг қимматли қоғозлари билан амалга оширилган битимлар ҳажми юқорилигича қолмоқда. Тижорат банкларининг умумий савдо айланмасидаги улуши 66,6% ёки 61,9 млрд. сўмни ташкил қилади.