2018 йилнинг 2 – 6 июл кунлари «Тошкент» Республика фонд биржаси
савдоларида 19 та акциядорлик жамиятининг акциялари билан 168 та битим қайд
қилиниб, 89,4 млн. дона оддий ва 0,5
млн. дона имтиёзли акциялар 10,0 млрд. сўмга сотилди. Ҳафта якунлари кўра USI
индекс кўрсаткичи 1077.31 (▼0.59) пунктни ташкил этди.
Таҳлиллар жами савдо айланмасининг 98,6 фоизи тижорат банклари қимматли
қоғозлари билан амалга оширилган битимлардан иборат бўлганини кўрсатди.
Энг йирик битим 4 июл санасида асосий секцияда “Savdogarbank”
АТБ нинг 86,9
млн. дона оддий акцияси билан 8,7 млрд. сўм миқдорида тузилди. Бир дона
акциянинг сотув нархи номиналига мос равишда 100
сўмни ташкил қилди. Йил бошидан буён эса, фонд биржасида ушбу банкнинг 146,9
млн. дона акцияси (устав фондининг 11,3 фоизи) билан 14,7 млрд. сўмлик 7 та
савдо битими тузилган.
Битимлар сони бўйича етакчиликни ўтган ҳафтада “Kvarts” AЖ эгаллаган ҳолда,
унинг 13,8 минг дона акцияси билан 66,5 млн. сўмлик 66 та битим амалга оширилди.
Таъкидлаш лозимки, “Kvarts” AЖ акциялари билан йил бошидан буён 8,0 млрд.
сўмлик 3386 та битим амалга оширилган.
Шунингдек, қимматли қоғозлар билан ўртача кунлик савдо айланмаси
ҳисобот даврида 2,0 млрд. сўмни,
ўртача битим қиймати эса 59,9 млн. сўмни ташкил этди. Шу билан бирга, ушбу даврда
сотилган бир дона акциянинг ўртача нарх кўрсаткичи 111,9 сўмдан иборат
бўлди.
Қимматли қоғозларнинг номинал нархига нисбатан юқори даражадаги фарқ “Neftgazqurilishta'mir”
AЖ акциялари билан тузилган савдо битимларида кузатилди. Бунда номинал қиймати 1
000 сўм бўлган жамият акцияларининг савдо кунидаги биржа нархи 25 000
сўмни ташкил этди.
Ҳафта давомида савдо айланмаси ҳажми юқори бўлган эмитентларни “Savdogarbank”
АТБ (ҳафталик савдо айланмасининг – 86,4 фоизи), “Turkiston” ХАТБ (12,0 фоиз) ва “Kvarts”
АЖ (0,7 фоиз) ташкил этди. Савдо айланмасининг 99,0 фоизи (9,96 млрд. сўм) улар
ҳиссасини ташкил этди.
Ўтган ҳафтада инвесторлар тоифасига кўра биржа савдоларида юридик
шахслар фаоллиги кузатилиб, тузилган умумий битимлар ҳажмининг – 87,0 фоизи ёки
8,7 млрд. сўмлик қисми айнан улар ҳиссасига тўғри келди, умумий битимлар
сонининг 96,4 фоизи эса (162 дона) жисмоний шахслар томонидан тузилган.
Бундан ташқари, ўтган ҳафтада фонд биржасида республикамизнинг 6 та
ҳудудида жойлашган листинг компаниялари қимматли қоғозлари билан савдо битимлари
имзоланди. Биржа битимларининг энг юқори ҳажми Тошкент шаҳридаги (98,8 фоиз) акциядорлик
жамиятлари ҳисобига тўғри келди.
Фонд биржасида йил бошидан буён 180,9 млрд. сўмлик 6209 та савдо битими
қайд қилинди. Ушбу даврда биржа савдоларида 89 та акциядорлик жамиятининг 6,5
млрд. дона қимматли қоғозлари сотилган.
