2018 йилнинг 29 октябрь – 2  ноябрь кунлари «Тошкент» Республика фонд биржаси савдоларида 21 та акциядорлик жамиятининг акциялари билан 238 та битим қайд қилиниб, 160,4  млн. дона акциялар 101,3 млрд. сўмга сотилди. Ушбу кўрсаткич жорий йилдаги ҳафта давомида қайд қилинган энг юқори даражадаги савдо айланмаси ҳисобланади.

Савдо айланмасининг юқори бўлишига ҳафта давомида тижорат банкларининг қимматли қоғозлари  билан амалга оширилган битимлар ҳажми ошганлиги асосий омил ҳисобланади (ҳафталик савдо айланмасининг 99,6 фоизи ёки 101,0 млрд. сўм). Хусусан, ҳафта давомида “Hamkorbank” АТБнинг 74,6 млн. дона оддий акцияси билан 70,9 млрд. сўм (ҳафталик савдо айланмасининг 70,0 фоизи) миқдорида 2 та савдо битими тузилди.

Шунингдек, биржа савдолари орқали “Turkiston” ХАТБнинг 17,0 млн. дона акцияси билан 17,0 млрд. сўмлик  (ҳафталик савдо айланмасининг 16,8 фоизи) 3 та битим тузилиб, бир дона акциянинг сотув нархи номинал қийматига мос равишда 1000 сўмни ташкил қилди. Бундан ташқари, ҳафта давомида савдо айланмасининг юқорилиги бўйича учинчи ўриндан “Universal bank” ХАТБ жой олди. Ўтган ҳафтада мазкур банкнинг 2,5 млн. дона оддий акциялари билан 12,7 млрд. сўмлик 11 та битим тузилди ва бу кўрсаткич ҳафталик савдо айланмасининг 12,6 фоизини ташкил қилади. Бир дона акциянинг сотув нархи 5000 сўмдан иборат бўлди.

Қимматли қоғозлар билан ўртача кунлик савдо айланмаси ҳисобот даврида 20,3 млрд. сўмни, ўртача битим қиймати эса 425,8 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 631,9 сўмдан иборат бўлди. 

Битимлар сони бўйича етакчиликни ўтган ҳафтада “Kvarts” AЖ эгаллаган ҳолда,  унинг 1556 дона акцияси билан 8,0 млн. сўмлик 88 та битим амалга оширилди. Ундан кейинги ўринларни эса “O'zsanoatqurilishbank” АТБ (308,3 млн. сўмлик 38 та битим) ва “Andijon tajriba-sinov zavodi” АЖ (14,6 млн. сўмлик 33 та битим) эгаллади.

Ўтган ҳафтада инвесторлар тоифасига кўра биржа савдоларида           юридик шахслар фаоллиги кузатилиб, тузилган умумий битимлар            ҳажмининг – 69,3 фоизи (70,2 млрд. сўм), битимлар сони бўйича эса – 34,4 фоизи (82 дона) айнан улар ҳиссасига тўғри келди.

Шунингдек, ўтган ҳафтада фонд биржасида республикамизнинг 8 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Андижон (70,0 фоиз), Фарғона вилоятлари (12,6 фоиз) ва Тошкент шаҳридаги (17,1 фоиз) акциядорлик жамиятлари ҳисобига тўғри келди. Тузилган битимлар сони бўйича эса Фарғона вилояти (42,0 фоиз) ва Тошкент шаҳри (26,9 фоиз) етакчилик қилди.

Фонд биржасида йил бошидан буён 541,0 млрд. сўмлик  8 589 та савдо битими қайд қилинди. Ушбу даврда биржа савдоларида 115 та акциядорлик жамиятининг 7,9 млрд. дона қимматли қоғозлари сотилган.