2018 йилнинг 19 - 23 феврал кунлари «Тошкент» Республика фонд биржаси савдоларида 17 та акциядорлик жамиятининг қимматли қоғозлари билан 62 та битим қайд қилиниб, 1,8 млн. дона акция 2,6 млрд. сўмга сотилди.

Таҳлиллар жами савдо айланмасининг 97,7 фоизи тижорат банклари ва 2,2 фоизи саноат тармоғидаги акциядорлик жамиятларининг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 23 феврал санасида асосий секцияда «Turonbank» АТБнинг 643,6 минг дона акцияси билан 1,09 млрд. сўм миқдорида тузилди. Бир дона акциянинг сотув нархи 1 700 сўмни ташкил қилди.

Битимлар сони бўйича етакчиликни ўтган ҳафтада «Ipoteka-bank» АТИБ эгаллаган ҳолда,  унинг 31,7 минг дона акцияси билан 155,4 млн. сўмлик 10 та битим амалга оширилди.

Қимматли қоғозлар билан ўртача кунлик савдо айланмаси ҳисобот даврида 517,2 млн. сўмни, ўртача битим қиймати эса 41,7 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 1 444,5 сўмдан иборат бўлди. 

Қимматли қоғозларнинг номинал нархига нисбатан юқори даражадаги фарқ «UZKABEL» АЖ ҚК акциялари билан тузилган савдо битимларида кузатилди. Бунда номинал қиймати 1 500 сўм бўлган жамият акцияларининг савдо кунидаги биржа нархи 10 000 сўмни ташкил этди.

Ҳафта давомида савдо айланмаси ҳажми юқори бўлган эмитентларни «Turonbank» АТБ (ҳафталик савдо айланмасининг – 42,3 фоизи),  «Ravnaq-bank» ХАТБ (30,9 фоиз), «Universal bank» ХАТБ (23,4 фоиз) ва «Sarbon-Neftegaz» АЖ (1,4 фоиз) ташкил этди. Савдо айланмасининг 98,0 фоизи улар ҳиссасини  ташкил этди.

Шунингдек, ўтган ҳафтада фонд биржасида республикамизнинг 5 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (75,0 фоиз) ва Фарғона вилоятидаги (23,5 фоиз) акциядорлик жамиятлари ҳисобига тўғри келди.

Фонд биржасида йил бошидан буён 14,5 млрд. сўмлик 228 та савдо битими қайд қилинди. Ушбу даврда биржа савдоларида 38 та акциядорлик жамиятининг 105,8 млн. дона қимматли қоғозлари сотилган.