Joriy yilning 28 may kuni “Poytaxt” biznes-markazida «Toshkent» respublika fond birjasi va Qozog'iston fond birjasi (KASE) vakillari o'rtasida uchrashuv bo'lib o'tdi.  Mazkur uchrashuvdan maqsad, O'zbekiston va Qozog'istonning investitsion imkoniyatlari bilan tanishish hamda jahon va Markaziy Osiyo mintaqasidagi sohaga oid mavjud tendensiyalarni, birja faoliyatiga oid axborotlar almashinuvi hamda ikki mamlakat fond bozorlarida birja a'zolarining (brokerlik idoralari) o'zaro ishtirokini ta'minlashga imkon beradigan savdo maydonchasini yaratish borasida hamkorlik to'g'risidagi Memorandum imzolash imkoniyatini muhokama qilishdir.

  Tadbirda “Toshkent” respublika fond birjasi, Qimmatli qog'ozlar markaziy depozitariysi hamda Qozog'iston fond birjasi boshqaruvi raisining o'rinbosari, shuningdek, Direktorlar kengashi va Boshqaruv kengashi a'zolari ishtirok etdilar.

Qozog'iston fond birjasi 1993-yil 17-noyabrda tashkil etilgan. Tashkil etilgan vaqtidan boshlab KASE Qozog'istonning fond, valyuta va pul bozorlariga xizmat qiluvchi yagona savdo maydonchasi va Markaziy Osiyo mintaqasidagi yetakchi fond birjalaridan hisoblanadi. Bu bozor repo bozori instrumentlari, valyutalar, davlat va korporativ qimmatli qog'ozlari, xalqaro moliya institutlarining obligatsiyalari, shuningdek, derevativ instrumentlar uchun universal savdo maydonchasidir.

KASE Jahon Birjalar Federatsiyasi (WFE), Yevro-Osiyo fond birjalari federatsiyasi (FEAS) hamda boshqa xalqaro va mahalliy professional uyushmalar a'zosidir. KASE birja savdolari hajmi bo'yicha MDHda ikkinchi, FEAS fond birjalari bozorining kapitallashuv darajasi bo'yicha oltinchi o'rinda turadi.

Ta'kidlash joizki, "Toshkent" Respublika fond birjasi va Qozog'iston fond birjasi Yevro-Osiyo birjalari federatsiyasi (FEAS) a'zolari sifatida fond bozorlarining likvidliligini va investitsion jozibadorligini oshirish borasida eng yaxshi tajribalarni o'rganish va amaliyotga tadbiq qilishga qaratilgan o'zaro hamkorlikni olib bormoqdalar.

Bo'lib o'tgan uchrashuv birjalar o'rtasidagi o'zaro hamkorlik aloqalarini yanada kengaytirishga xizmat qiladi deb umid qilamiz.