2025-yil 14-aprel — Yoshlar orasida moliyaviy savodxonlikni oshirish tashabbusi doirasida, “Toshkent” Respublika fond birjasi Markaziy Osiyodagi yetakchi xususiy tadbirkorlik oliy o‘quv yurtlaridan biri bo‘lgan TEAM University talabalari uchun ochiq ma’ruza tashkil etdi.

Tinglovchilar oldida birja boshqaruvi raisi Georgiy Paresishvili chiqish qilib, kapital bozorining ishlash tamoyillari, fond birjasining iqtisodiyotdagi o‘rni hamda zamonaviy investitsiya vositalari haqida batafsil ma’lumot berdi.

“Barqaror moliyaviy madaniyatni shakllantirish — barqaror iqtisodiy o‘sishning strategik vazifasidir. Biz faqat bozorni rivojlantirish bilangina cheklanmay, balki moliya sektorining kelajagi bo‘lgan yoshlar bilan bilim almashishga intilamiz”, — deya ta’kidladi Georgiy Paresishvili.

Tadbir interaktiv shaklda o‘tkazildi. Talabalar birja infratuzilmasining ishlash prinsiplari, savdoga qo‘yiladigan aktivlar turlari, shuningdek, O‘zbekistonda va xalqaro darajada bozorlarning rivojlanishiga ta’sir ko‘rsatuvchi trendlar haqida tushunchaga ega bo‘lishdi.

Mazkur ma’ruza “Toshkent” Respublika fond birjasi tomonidan amalga oshirilayotgan keng qamrovli ta’lim dasturining bir qismi bo‘lib, uning maqsadi — kelajakdagi mutaxassislarni tayyorlash va yoshlarda investitsiyaga bo‘lgan qiziqishni oshirishdir.