PRESS-RELIZ: "Toshkent" Respublika fond birjasi "Yangi O‘zbekiston" universiteti talabalari uchun kapital bozori haqida ma'ruza o‘tkazdi
23.04.2025
2025-yil 22-aprel kuni "Yangi O‘zbekiston" universitetida "Toshkent" Respublika fond birjasi tomonidan yoshlar orasida moliyaviy savodxonlikni oshirish tashabbusi doirasida ochiq ma'ruza tashkil etildi.
Fond birjasi Boshqaruvi raisi Georgiy Paresishvili talabalar oldida chiqish qilib, kapital bozorining ishlash mexanizmlari, fond birjasining iqtisodiyotdagi o‘rni hamda O‘zbekistonda mavjud zamonaviy investitsiya vositalari haqida bilimlarini ulashdi.
Ma'ruza jonli muloqot shaklida o‘tdi: talabalar faol ishtirok etib, savollar berishdi va moliyaviy vositalar turlari, fond bozori ishlash tamoyillari hamda investorlar xatti-harakatiga ta'sir qiluvchi global tendensiyalar haqida tasavvurga ega bo‘lishdi.
Ushbu tadbir "Toshkent" fond birjasining moliyaviy madaniyatni rivojlantirish va iqtisodiyot hamda moliya sohasida malakali mutaxassislar tayyorlashga qaratilgan ta'lim dasturining bir qismi bo‘ldi.