2024-yil 18-aprel kuni Samarqand shahrida qimmatli qog‘ozlar bozoriga bag‘ishlangan bir qator tadbirlar bo‘lib o‘tdi. “Toshkent” Respublika fond birjasi (RFB) rahbariyati FEAS (Yevro-Osiyo fond birjalari federatsiyasi) boshqaruvi yig‘ilishi va MDH XBA (Xalqaro birjalar assotsiatsiyasi) a’zolarining umumiy yig‘ilishida ishtirok etdi.

“Toshkent” RBF Boshqaruv raisi Georgiy Paresishvili FEAS tadbirida kirish so‘zi bilan chiqdi va FEASni yanada rivojlantirish rejalarini, jumladan, federatsiya a’zolari o‘rtasidagi hamkorlikni mustahkamlashga qaratilgan tashabbuslarni muhokama qildi.

Shu bilan birga, “Toshkent” RFB Boshqaruv raisi o‘rinbosari vazifasini bajaruvchi Yuliya Gafarova MDH XBA yillik yig‘ilishida ishtirok etdi, unda komissiya a’zolarining hisobotlari va tashkiliy masalalar muhokama qilindi. Komissiya a’zolari tomonidan Taftish komissiyasi tarkibiga o‘zgartirishlar kiritildi. Yangi taklif etilayotgan oʻzgartirishlar ovozga qoʻyildi. Natijada assotsiatsiya a’zolari kelgusidagi yangi strategiya va rejalarni qabul qildilar.