"Toshkent" Respublika fond birjasi tomonidan Toshkent shahridagi Xalqaro Vestminster universitetida (TXVU) kapital bozori uchun yuqori malakali kadrlar tayyorlashga qaratilgan amaliyot dasturi loyihasi muhokama etildi.

Uchrashuvda universitet rahbariyati, Qimmatli qog‘ozlar markaziy depozitariysi, brokerlik tashkilotlari vakillari ishtirok etib, mazkur tashabbusning mazmun-mohiyati va uni amalga oshirish mexanizmlari yuzasidan fikr almashdilar.

Loyiha doirasida talabalar 6 oy davomida kapital bozorining asosiy ishtirokchilarida bosqichma-bosqich amaliyot o‘tash orqali quyidagi imkoniyatlarga ega bo‘ladilar:

- qimmatli qog‘ozlar bozorining amaliy jarayonlarini chuqur o‘zlashtirish;

- sohada zarur professional ko‘nikma va amaliy tajribaga ega bo‘lish;

- mehnat bozorida raqobatbardosh mutaxassis sifatida shakllanish.

Shu bilan birga, dasturda ishtirok etgan talabalar o‘z bilim va tajribalarini boshqa talabalar bilan ulashish orqali sohada bilimlar tarqalishiga hissa qo‘shishlari ko‘zda tutilgan.

Bugungi kunda oliy ta’lim muassasalarida moliya va iqtisod yo‘nalishlari mavjud bo‘lishiga qaramasdan, kapital bozori va qimmatli qog‘ozlar sohasiga ixtisoslashgan kadrlar tayyorlash tizimi yetarli darajada shakllanmagan. Ushbu amaliyot dasturi mazkur bo‘shliqni to‘ldirishga xizmat qilib, mamlakat kapital bozorining barqaror va izchil rivojlanishiga muhim hissa qo‘shishi kutilmoqda.

“Toshkent” Respublika fond birjasi ushbu tashabbusni amalga oshirish orqali sohada professional kadrlar zaxirasini shakllantirishni o‘z faoliyatining ustuvor yo‘nalishlaridan biri sifatida belgilab olgan.