O‘zbekiston kapital bozorida yangi moliyaviy instrument — ipoteka obligatsiyalari muomalaga kiritildi.

“O‘zbekiston Ipotekani qayta moliyalashtirish kompaniyasi” AJ huzuridagi “UMRC SPV” MCHJ tomonidan mamlakat tarixida ilk bor ipoteka obligatsiyalari muomalaga chiqarildi. Bu O‘zbekiston kapital bozorida ipoteka bilan ta’minlangan qimmatli qog‘ozlarning ilk emissiyasi hisoblanadi.

Mazkur emissiya O‘zbekiston Respublikasi Prezidentining 2025-yil 21-fevraldagi PF–26-sonli “Uy-joy va ipoteka bozorini yanada rivojlantirishga oid qo‘shimcha chora-tadbirlar to‘g‘risida”gi Farmoni ijrosi doirasida amalga oshirilmoqda.

Farmonga muvofiq, maxsus vakolatli tashkilot tomonidan tijorat banklarining ipoteka kreditlari jamlanmasi asosida jami 200 mlrd so‘mlik ipoteka obligatsiyalarini tajriba tariqasida muomalaga chiqarish hamda ularni “Toshkent” Respublika fond birjasi orqali joylashtirish va muomalaga kiritish nazarda tutilgan.

Ushbu loyihaning birinchi bosqichi doirasida 2026-yil 8 iyul kuni 40,56 mlrd so‘mlik ipoteka obligatsiyalari bilan yopiq obuna orqali AT "Xalq banki" ishtirokida bitim amalga oshirildi.

Mazkur bitim ipoteka obligatsiyalarining birja savdolaridagi muomalasiga amaliy start berib, mamlakat kapital bozorida yangi moliyaviy instrumentdan foydalanish imkoniyatini ochib berdi.