“Toshkent” Respublika fond birjasida Al Muamalat Consulting kompaniyasi vakillari bilan uchrashuv bo‘lib o‘tdi. Uchrashuvda O‘zbekiston kapital bozorida sukuk instrumentlarini joriy etishning huquqiy va amaliy jihatlari muhokama qilindi.

Xususan, tomonlar sukukning turlari, ularni chiqarish va joylashtirish mexanizmlari, shuningdek, ushbu jarayonda ishtirok etuvchi shariat bo‘yicha maslahatchi (Shariah Advisor), anderrayter va brokerlarning vazifa va mas’uliyatlari yuzasidan fikr almashdilar.

Shuningdek, sukuk chiqarish jarayonida maxsus maqsadli kompaniyani (SPV — Special Purpose Vehicle) tashkil etish, uning faoliyat mexanizmi va ushbu tuzilma bilan bog‘liq soliq masalalari ham muhokama qilindi.

Ayni paytda “Toshkent” Respublika fond birjasida “Kapital bozori to‘g‘risida”gi qonun loyihasida nazarda tutilayotgan sukuk instrumentlarini amaliyotga joriy etishga tayyorgarlik ishlariga alohida e’tibor qaratilmoqda.

Ushbu yo‘nalishda Birja sukukning har bir turi bo‘yicha alohida ixtisoslashgan mutaxassislarni tayyorlash, ularning nazariy va amaliy bilimlarini oshirish hamda muayyan sukuk turi bo‘yicha malakali ekspertlar korpusini shakllantirishni rejalashtirmoqda.

Tomonlar ushbu masalalarni keyingi uchrashuvlarda ham muhokama qilish va sukuk instrumentlarini joriy etish bo‘yicha hamkorlikni davom ettirishga kelishib oldilar.

Ma’lumot uchun: Al Muamalat Consulting — O‘zbekistonda faoliyat yurituvchi konsalting kompaniyasi bo‘lib, islomiy moliya mahsulotlarini ishlab chiqish, innovasion moliyaviy yechimlarni joriy etish hamda moliyaviy institutlar uchun islomiy bank ishi va moliya yo‘nalishida treninglar tashkil etish bo‘yicha xizmatlar ko‘rsatadi.