O‘zbekiston Respublikasi rezidentlari uchun “Tartibga solish qumdoni”da ishtirok etish imkoniyati joriy etildi

Adliya vazirligi tomonidan Istiqbolli loyihalar milliy agentligi direktorining kapital bozori sohasida “Tartibga solish qumdoni” maxsus huquqiy rejimini taqdim etish tartibi to‘g‘risidagi Nizomga o‘zgartish va qo‘shimchalar kiritish haqidagi buyrug‘i davlat ro‘yxatidan o‘tkazildi (ro‘yxat raqami 3493-1, 2026-yil 3-aprel).

Yangi tartibga ko‘ra:

• “Qimmatli qog‘ozlar markaziy depozitariysi” AJ va “Toshkent” RFB qo‘shimcha ro‘yxatdan o‘tmasdan “Tartibga solish qumdoni” doirasida operatsiyalarni amalga oshirish huquqiga ega bo‘ldi;
• chet ellik nominal saqlovchilarga qimmatli qog‘ozlar bo‘yicha hisobvaraqlar ochish hamda O‘zbekiston Respublikasida o‘z faoliyatini to‘g‘ridan to‘g‘ri yoki agent orqali amalga oshirishga ruxsat berildi;
• korporativ obligatsiyalarni chet el valyutasida chiqarish va ular bo‘yicha hisob-kitoblarni amalga oshirish imkoniyati joriy etildi;
• chet ellik nominal saqlovchilarning hisobvaraqlarida hisobga olingan qimmatli qog‘ozlar va pul mablag‘lari ularning benefitsiar mulki hisoblanmasligi aniq belgilab qo‘yildi;
• qimmatli qog‘ozlarning nominal hisobvaraqlar o‘rtasida, benefitsiar mulkdor o‘zgarmagan holda to‘lovsiz o‘tkazilishi soliq majburiyatini keltirib chiqarmasligi belgilandi;
• chet ellik nominal saqlovchilarga litsenziya olmasdan, filial yoki alohida yuridik shaxs tashkil etmasdan O‘zbekiston Respublikasida faoliyat yuritish imkoniyati yaratildi;
• korporativ nizolar hamda depozitar tilxatlar bilan bog‘liq munosabatlardan kelib chiqadigan nizolarni taraflar kelishuviga ko‘ra xalqaro tijorat arbitrajida ko‘rib chiqish imkoniyati yaratildi.