"Toshkent" Respublika fond birjasi tomonidan birja kotirovkalash varag‘i to‘g‘risidagi Nizomga o‘zgartirish kiritish bilan bog‘liq matni jamoatchilik muhokamasiga taqdim etildi

Mazkur hujjat loyihasi O‘zbekiston Respublikasi Prezidentining 2025-yil 18-dekabrdagi “Kapital bozorida investitsiya muhitini yaxshilashga doir qo‘shimcha chora-tadbirlar to‘g‘risida”gi PF–254-sonli Farmonida belgilangan ustuvor vazifalar ijrosini ta’minlash maqsadida tayyorlangan.

Yangi tahrirda kapital bozorini liberallashtirish va jozibadorligini oshirishga qaratilgan muhim yangiliklar nazarda tutilgan. Jumladan, rezident-emitentlar korporativ obligatsiyalarini xorijiy valyutada chiqarish va hisob-kitoblarni chet el valyutasida amalga oshirish, shuningdek, xorijiy aksiyalar, obligatsiyalar, ETFlar va depozitar tilxatlar bo‘yicha savdolarni tashkil etish imkoniyatlari belgilanmoqda.

Ushbu yangiliklar milliy kapital bozorini xalqaro moliya bozorlari bilan integratsiya qilish, investorlar uchun yangi imkoniyatlar yaratish va bozor infratuzilmasini yanada rivojlantirishga xizmat qiladi.

Nizomning o‘zgartirish kiritish bilan bog‘liq matni jamoatchilik muhokamasi uchun Birjaning rasmiy veb-saytida e’lon qilindi. Muhokama yakunlariga ko‘ra, hujjatning yakuniy to‘liq matni o‘zbek, rus va ingliz tillarida tasdiqlash va e’lon qilish rejalashtirilgan.

Hujjat loyihasi bilan tanishish, taklif va mulohazalar bildirish uchun u veb-saytning interaktiv xizmatlar bo‘limida joylashtirilgan bo‘lib, e’lon qilingan kundan boshlab 15 kun davomida muhokama qilinadi.

Barchani mazkur muhokamada faol ishtirok etishga chaqiramiz.